Startseite
Heimatgruppe
Termine
Niederschwedeldorf damals
Niederschwedeldorf heute
Heimatstube
Berichte und Bilder
Patenstadt Georgsmarienhütte
Vertreibung
Denkmalpflege
Persönlichkeiten
Tradition, Sitten und Bräuche
Mundart
Literatur
Familienforschung
Kontaktadressen
Links
Gästebuch
Impressum
 


Fresch gebacka, gutt geroota,
Softich on met Sträßelknoota
Lacht vom Kuchabraate roa
Miech der Sonntichskucha oa.
Wie a doo eim Softe quellt,
Ob a siech bis manne hellt?
Weil ärn heut erscht Sennomd ies,
Ies die Sache nee gewieß.
Iech mecht a weengst amool versucha,
Duo, da schiene Pflaumakucha.
Doß em etwa nee woas fahlt,
Manne ies a ju schonn aalt.
Wenn iech ämool drieber zieh,
Langt a nooch fer manne frieh.
Wenn iech nee zo sähr nei sah,
Hoots nooch zom Kaffee aa.
Heechstens, doß mei Weib reesniert,
Doß iech doo hoa schonn schnoabliert. –
Iech nahm erscht es Ranftla droa,
Doo sitt ma´m Kucha nee viel oa.
Bloß, doß a Geschmaak nee hoot,
Es fahlt der Sträßel, es fahlt der Soot. –
Iech wa mer erscht än Kaffee briehn
On dernochern drieber ziehn.
War Honger hoot, sool siech nee schama,
Iech war mer´n Ronke ronder nahma!
Weil mir der Zieps oam Gauma brieht,
Es notzt etz nischt, iech hoa Optiet! –
Es ies woll a verpochtes Deng,
A Sträfla ies halt doch zoweng,
Voll´s wu iech doo nooch Kaffee hoa,
Muß nooch a zweetes Sträfla droa. –
Nu ies bei Leibe nooch nischt zo fiehla,
Iech mecht a drettes nonderspiela.
Es hoot asu wie asu känn Zweck,
Die Hälfte ies ju schon foast weg.
Es fällt ju etza doch schon uuf.
Ock Kucha nei, on Kaffee druuf! –
Wu a etz foast zor Nääge gieht,
Doo ies a weg der Opetiet.
Der Honger weg on vuul der Leib.
Verflimmt no amoal, etz kemmt mei Weib!
Ock schnell doas Brockla zugedackt!
Nä, hätt sán ock äänzich blooß vertsackt.
Iech wär bestemmt nee droageganga.
Woas schiert se denn erscht mei Verlanga
On stellt a fer die Noase mir,
Iech koan doo werklich nee derfier.
Doß iech doo ganne Kucha ass´
On miech derbeine halt vergaß.
Schließlich ies se salber schold,
Iech hoa´s beileibe nee gewollt.
Wär a die Hälfte asu schien,
Doo teet a nooch oam Braate stiehn.
Denn a Kucha, dar nee schien on gutt,
Kä Moannsbeld woas zo läde tutt.                                           

Erhard Gertler    



 
Top